第一次業委會會議 – 全程冇投票説了算實錄

不設列席業主提問

不知不覺，新一屆業委會第一次會議已經喺一個多月前嘅8月8日星期二下晝開左，全屋苑2213戶，當日包括譚太在內，只有3戶4位業主列席旁聽，比例實在乏善足陳。另外會議過程中冇按照過去4年業委會一貫嘅「議事規則」設有列席業主發言提問，就算譚太善意提醒，會議主持Tony 陳經理都置若罔聞，話由於新一屆業委會仲未訂下任何規則，所以直接宣佈散會，不設業主提問?! 通告寫就寫到歡迎業主列席，其實完全唔想業主參與屋苑事務，剝削業主運用正常渠道表達意見嘅權利。

而近日鄰居都相繼問起譚太關於呢一次會議嘅情況，例如選左邊個做主席，議決結果又如何等問題。其實管理處喺會後短暫性係有張貼過2張紙嘅會議記錄撮要喺各座大堂，但內容避重就輕，連要使屋苑公家錢，富有爭議性嘅工程項目都隱藏完全無提及，黎到今日仲有業主連選左邊個做主席都未知，譚太唯有花D時間整理當日嘅筆記同大家分享，當中包括譚太本想喺會上表達嘅個人意見。

管理處罕有張貼「會議記錄撮要」

喺「其他事項」總公司經理陳小姐表示收到前業委會對信德物管提供一共$5萬獎學金資助嘅聲音反饋, 總部經過考慮之後願意改為資助屋苑外墻勘察$35萬, 令到全屋苑嘅居民都能受惠。會上委員陳小姐極力建議管理處及早就信德願意資助外墻勘察一事向業戶居民「報喜」,管理處亦罕有咁喺會後一個星期喺業委會嘅報告板上張貼左一份「會議記錄撮要」, 内容清晰講明「外墻勘探資助是跟進經理人酬金的結果」, 同委員張小姐喺會上聲稱第八屆業委會已爭取到信德某高層承諾嘅$50萬資助, 可惜當時比人推翻… 所以呢$35萬係呢一屆業委會爭取到嘅事實完全不吻合。

但係不知係何種原因,文件 (編號: BEL/MO/2023/08/095N) 好快就被除下。取而代之嘅係住宅部業委會一個經管理處審核過嘅宣傳彩頁(編號: BEL/OC/N/2023/002) ，内容提及外墻航拍係8月新一屆業委會上任後才啟動, 又話成功爭取到信德資助航拍費用等不實言論。話就話呢個告示板係住宅部業委會專屬啫，內容都經過審核，管理處明知係不實嘅信息都唔阻止，仲要背書幫手貼喺大堂當眼處，擺明係誤導居民喎，連維護業主接收正確資訊嘅權利都做唔到，呢個公契經理人究竟係點做嘅呢？

唔見左會議撮要，換左業委會呢個不實宣傳海報

選舉主席冇議決就直接宣佈邊個做？

• 睇返撮要都見到，選舉主席只有提名人同和議人，就係冇左投票嘅部份，主持陳經理又冇問在席其他委員有冇人反對，跟住就急不及待咁宣佈Alice張小姐當選咗，過程都幾兒戲，係過去兩屆4次主席選舉環節都從未出現過。嗰日有14位委員出席，需要過半數委員贊成先算通過 ，咁主席一職而家究竟係懸空定係由管理處代任？抑或反正都係得一個提名就咁算？

訂立紀律守則及利益衝突申報聲明，點解會係一個議程?

• 管理處加入呢個議程真係好離奇。2020年嘅業主大會中已100%全票通過左管理處職員、外判承辦商同業委會委員必須遵守，一個在業主大會上通過的議決,如果要修改推翻都同樣需要喺業主大會上由業主居民同意先至合情合理。 管理處點解無端端又要再提出討論表決呢？真係莫名其妙!

修訂業委會會議常規，點解捨近取遠，指明要用第七屆(6年前)嘅版本做藍本修改?

• 會議主持Tony陳經理代表管理處喺會期前一日向業委會發出管理處制訂嘅「議事規則」版本並希望委員即場投票通過。管理處係咪唔記得喺業委會嘅角色係秘書，係冇權力修改業委會嘅議事規則呢？
• 另外委員Yvette陳小姐及Alice張小姐異口同聲提出採用2017年第8屆業委會版本略作修改使用。但第9及10屆業委會已按第8屆2017年嘅規則修訂，陳小姐自己都有和議同贊成。點解唔跟返最新版本仲要攞六年前嗰個過時嘅版本去修改？

臨時急推會所更衣室翻新工程項目

會所同工程經理喺其他事項分別加插報告會所游泳池嘅男女更衣室即將進行「天地牆」大翻新裝修，正分階段聘請工程顧問同裝修承辦商，會後會發出標書比委員過目審核咁話。預計分別於9月21日及11月27日完成招標程序，工期70天明年一月底會完工。

• 「翻新更衣室工程」重來唔喺2023年嘅預算案之内
• 5年計劃中也都淨係喺2025年預算在80幾萬翻新更衣室天花同儲物櫃
• 今年4月份室內泳池天花下墜，當時業委會要求管理處喺處理緊急維修嘅同時研究全面翻新相連泳池更衣室並提交proposal 及工程時間表比當時嘅委員討論跟進。但係一直到7月13日轉屆之前主席王太出埋電郵，管理處都一直冇回應，業主大會上又有匯報，直至3個星期後今屆業委會第一次會議就做好哂標書，又有埋70日呢個工期？實在係太過神速，完全唔似管理處一向萬事嘆慢板嘅作風。
• 會議上業委會既冇就管理處突然提出嘅工程項目投票、亦完全冇提問質詢工程範圍、必要性、預算同埋用乜嘢資金等細節，只係要求管理處將標書內容翻譯成中文方便委員閲覽，好似業委會同管理處之間已經有一定嘅默契，勢在必行咁。事後經陳小姐證實，直至會後今日嘅一個多月，無論第10屆定係新一屆業委會都係未有就管理處而家推出嘅翻新男女更衣室工程做任何議決表態，但竟然標書又可以照出？
• 以譚太熟悉信德物管一向運作邏輯，既然會所翻新工程已經喺2019年嘅業主大會中被推翻，管理處係冇理由今次可以先斬後奏，搶先喺委員冇討論共識、冇議決投票、冇打算諮詢業戶意見嘅大前提下就全速為工程進行招標。資深業委張小姐喺「當選主席」後不斷强調要追返之前4年失去嘅時間, 估計係想重推之前第七第八屆嘅四大工程亦係人之常情。但係會唔會係操之過急呢? 有冇諗汲取到上一次嘅經驗，諗吓點樣增加訊息透明度從而爭取大部分持份者嘅支持呢? 做公家事務同裝修自己單位唔同，唔可以閂埋門憑自己直覺做哂決定話做就做; 用到公家儲備去做呢D非緊急又牽涉設計元素嘅工程項目，係好需要做足同業主居民溝通既準備功夫，絕對唔可以急於求成，一蹴而就。
• 反觀喺過去第9和第10屆由譚太，曾生，工程小組和財務及采購小組提出的改善工程方案都一一被管理公司以不同嘅藉口拖延而不能成事。好似更換戶外天花咁，根據 2019年嘅顧問報告已經出左初步預算，2020年信德物管前經理柳依琳曾不止一次「提醒」業委會由於相關工程已經喺2019年嘅特別業主大會中被推翻，因此有關工程也必須要喺業主大會上通過才可以。後來委員及工程小組成員經過實地視察後，先後幾次要求管理處著手研究並提出全面更換方案然後交回業主大會決定，管理處陳經理最終都只係不斷重複表示會聘用承辦商進行局部維修，而大家都眼見佢地有冇好積極回應去做。
• 另外，相比起第10屆嘅業委會，新一屆業委會委員背景組合中係冇一位好似去屆委員2座曾生一樣擁有專業工程資歷同工作經驗。而曾生喺過去2年無論喺審核工程範圍及標書內容中都比過好多有用有建設性嘅意見，貢獻良多，甚至自身工作繁忙都請假同工程經理行場討論工程疑難，親自參加會所大型冷氣機件運作驗收，咁點解過去兩年業委會有咁好嘅人脈資源唔好好運用，管理處非必要等到新一屆委員上任先至大力催谷，急於將D唔緊急又富爭議性嘅工程草草上馬呢？真係好值得我地業主們深思！

隨保安合約附送居民物資何去何從？

管理處決定由8月1日開始臨時增聘一個保安員駐守寳翠會入口大堂，負責會所訪客登記阻截漏網之魚，為期一個月。新一屆表示業委會話唔知情，查問後又表示無需要呢個崗位去幫出入住戶開門 (崗位喺會後一個星期已消失)

• 保安經理匯報警衞國際按標書承諾提供左50把雨傘同AED 自動體外心臟去顫器比屋苑使用。咁呢D物資放左喺邊？由邊一個單位負責保管？前線保安員當中有幾多個職員擁有相關急救資歷？遇上危急關頭，住戶應向哪裏求助？隨合約附送的物資屬於業主居民，點解管理處遲遲唔出通告通知住戶居民？

會所匯報

李沛輝委員提出更改部份已訂購嘅兒童遊樂設施為老人設施。張玉蘭委員隨即要求管理處與承辦商Cityscape 商討將第一座基座下面嘅有蓋兒童游樂設施變更為長者用途提供方案。

會所蔡經理表示改變内容牽涉違約賠償，其實會所10樓花園（近8座對出位置）早年已改建增設長者設施，另外亦計劃短期内推出更多長者活動。

• 自從喺寳翠會花園魚池傍邊由發展商規劃安裝具有特色嘅兒童木製火車因損壞移走後，已經喺第六屆嘅時候被換上長者設施，局部更改左原先設計格局。再加上歷時四年全面更換兒童遊樂設施結果係經過第10屆委員充份討論、投票及與中標承辦商商議嘅成果。況且委員建議牽涉更改原有設施用途，改變屋苑原先打造有生機活力嘅氛圍，減低吸引年輕家庭入住，影響樓價，值得嗎？
• 會所十樓遊戲室內即魚池旁邊有半開放式房間被長期空置，要照顧長者需要，點解唔考慮加法，好好利用呢個有上蓋嘅地方購置優質適合長者使用嘅運動設施？

工程匯報

室内游泳池天花清拆工程預計於8月中完工。原來標書管理處建議只包括清拆泳池中央已倒塌的 promat 板及三條通道的鋁質條子天花。按新一屆委員要求，中間原先打算保留的密封部分也需要同時清拆，所以要留待下一個階段的招標進行，維修工程預計於9月下旬先展開。

各座外牆勘察安排和進度

管理處較早前於6月28日完成以航拍目視（aerial visual)及熱感掃描（thermal scanning)技術檢視第六座外墻7成面積，初步發現一共有85個位置有空心磚或裂痕，總面積為18平方米，結果比預期好，管理處會儘快完成檢測屋苑其他部分並同步招標率先修繕第六座出現問題外墻部分。

未清走舊資料就豪花50萬提升八達通系統容量？

委員詢問管理處打算何時更新已搬走住戶資料；Cherry 陳經理以「系統已經老化」同「内置記憶已不夠用」為由而表示不可能喺現階段好似喺好多年前咁喺各座大堂放置電腦比業主住戶從新拍卡登充，仲話「承辦商建議先將整個八達通系統和空間容量升級」，之後先至再做重新登記。

Tony 陳經理表示管理處已一早預算在下半年安排系統升級，現按新一屆在席委員要求會加快處理。

• 由於譚太三年前已發現管理處一直沒有恆常規劃妥當處理系統資料更新而引致系統容量不足, 住戶拍卡失靈情況時有發生, 所以一直要求管理處想做好住戶資料更新之後才評估這個預算$50萬系統升級的必要性, 并且在上一屆的業委會中提出暫緩系統容量提升的建議, 並要求管理處儘快將已不是業主住戶的資料從八達通系統上刪去.  甚至在業主大會上也再次提出, 可惜管理處一直沒有做任何資料庫更新的打算。
• 值得留意嘅係於指定日期輪流喺各座大堂放置電腦比出入住戶居民拍卡重新登記係唔能夠代替管理處須要以人手核實業主住戶身份呢一個重要步驟！管理處三番四次喺委員業主提醒下仍然疏忽職守，喺新一屆委員上任就重推工程，將暫緩嘅議決拋諸腦後，以拖字訣去應付一D管理處唔想處理嘅正常事務，等新一屆委員上任又可以急急重推，增加屋苑不必要晚支出，實在唔係居民之福！

停車場改善工程

• 過去兩屆4年車場代表一直保持緘默嘅情況出現逆轉，今屆私人停車場代表趙漢偉委員就主動話最近有去過車場巡視過
• 信德總部經理陳小姐話因為大業主想增設時租充電停車位，所以同環保署傾緊車位充電設施資助，有結果會同再同業委會滙報，態度非常積極。
• Tony 陳經理亦一反上任以來對於住宅停車場十問九不知嘅態度，對於車場維修工程進度瞭如指掌，奇哉！

新人事新作風可以理解， 但係業委會嘅工作冇連續性最終輸嘅係小業主

喺今年5月份第10屆業委會進行最後2次會議討論七月AGM嘅議程嘅時候，譚太仍然以委員身份動議將幾個涉及屋苑管理嘅事項加入大會議程交由業主議決定奪，可惜都一一被身邊嘅委員「勸退」，話呢D事唔需要交上業主大會表決，最後演變到話比時間管理處探討，之後再用電郵方式投票議決，包括:

• 揀選核數師 (管理處喺譚太催促下一直拖延遲遲唔招標)
• 經理人酬金由5%下調至3%
• 業委會恒常會議增設網上直播模式，供業主列席旁聽
• 將屋苑專屬投標箱遷回屋苑範圍內，兩條鎖匙分別由信德總公司及駐場村經理分開保管

另外譚太亦曾要求業委會喺任期結束前為以下課題投票表態:

• 全面更換平台及10樓戶外天花工程意向，並由管理處向業委會提交方案及報價預算參考定案
• 通過已過審批並獲發「准養證」之業戶必須為其出現攻擊性行為或體重達20公斤或以上之狗隻於公共地方範圍內戴上口罩
• 通過管理處設立「寶翠園合約外判承辦商職員嚴重違規達紀黑名單記錄」，永久保留並當於轉換新承辦商時確切執行「永不錄用」指示

最終結果有六項動議都因為「人為刻意唔回覆造成冇足夠法定人數投票」而難產！喺電郵討論其間譚太表示業委會工作有連續性嘅必要，所以就算任期即將完結仍然希望各委員無論贊成與否都務必投票，一盡委員之責任。當中有反對有贊成嘅聲音係好正常，但最令譚太驚訝嘅係資深委員陳小姐竟然有「業委會工作有延續性係偽命題」嘅諗法。回顧返過去幾年每當業委會轉屆出現人事更替嘅時候，某一方業委新上任時候都采取立場行先嘅姿態，不理客觀事實，唔顧屋苑整體利益而刻意針對前朝上一屆業委會所揀選嘅承辦商及決定，想儘辦法提出更換選人不利己，造成惡性循環，實在唔係小業主之福也！

要求業委會儘快成立各個工作小組

而喺行政上接收指示上有180度逆轉，都會對管理處容易造成訊息混淆且無所惜從嘅負面影響; 另外業委會咁做亦都比左管理處機會將一D佢地唔想做、或者唔願意做嘅事項拖延，直至轉屆有新委員上任一切又reset，好似乜嘢都冇發生過咁。試問業委會喺咁嘅情況下又點會起到監察屋苑管理運作嘅作用呢？實例好似喺第九屆譚太同時任業委Ringo就將成立各個功能小組嘅運作規範搞清楚編制好，目的係廣納勝任賢才，令業主有多一個參與關心屋苑事務嘅渠道嘅同時，又可以幫輕吓業委日常工作。最重要嘅係杜絕以往有個別資深業委會成員閉門自己成立「小組」做出決定又冇記錄，甚至邀請無擁有任何公職嘅鄰居友好隨時參與同管理處開會做決策嘅亂象陋習！

但係睇返新任業委上場兩個月仍然仲未見有公開招募各個小組成員嘅動作，譚太覺得情況都唔太樂觀，希望業委會可以慎重考慮要求管理處配合，盡快為招募工作小組成員作出時間規劃。咁究竟業委會嘅工作需不需要有連續性? 歡迎大家留言理性討論。

2023年9月17日