2024年屋苑財政預算案
業委會第三次會議黎緊星期一（20/11）下晝2點半舉行。最大支出兩年嘅保安同清潔合約已經喺10月加哂人工，2023年預測有冇做到收支平衡? 2024年度預算案駛唔駛加管理費？抑或要削減民生經常性服務開支好似清抹外窗同維修先至搞得掂？
全面更換屋苑沖厠水部件刻不容緩
屋苑供應厠水設施殘舊，除第八座得天獨厚外, 其餘各座周之無日停廁所水，管理處一直避開唔做系統性主要部件（如水泵，加壓器，法蘭皮等）更換工程招標（即係連人工包料），而要將購買部件同工程斬件分拆開2個部份採購:
- 首先用邀標方式採購水泵（一方面因為唔過$100萬而唔需要公開招標，另一方面因為唔涉及工程所以唔使用巿建局「電子招標平台」）
- 跟住就每次等運到, 邊度爆邊度出問題先至用信德自己認可承辦商報價，逐單唔過$10萬嘅工程就唔使用「電子招標平台」而用返物管公司自己名單採購就得。次次急 call 師傅上門睇，訂零件（仲要未必即時有貨），要管理公司總部批出先再整。如果周末出事為左慳非工作日急call 費用，仲要押後工程過左週末先至做。一個維修工程斷斷續續要整幾個星期， 費事失事之餘仲令到所有業主住戶叫苦連天。個個住戶準時交管理費，業委會同管理處職責係服務居民，就算做唔到身同感受，都好應該用些少同理心去體察民情吖！
$10萬以上工程可以避開唔用巿建局「電子招標平台（公眾版）」
2022年嘅業主周年大會以全票通過左所有超過$10萬嘅工程, 管理公司一律要用「巿建局電子招標平台（公眾版）」招標。而家未做全面更換就無端端搞外判保養合約比承辦商？咪即係變相繼續出左問題見壞先至整，到時零部件又拆開分批採購，維修工程責任又外判埋出去，管理處冇左主導權，屋苑居民更加只有肉隨砧板上，維修費用必然節節上升！
運用大廈基金進行系統性更換維修工程
大廈公契3.5.1(a)段訂明成立大廈基金目的係用以支付非經常性資本性開支，包括購買，更換及改善工程。管理處多年以來以「貯錢應付將來大維修」為名而刻意將需要及時整改維修工程拖慢或以斬件式處理，一來可以從中多抽取5％經理人酬金，另外亦可以按照管理公司自己步伐去決定做定唔做，幾時做同點樣做，業主住戶根本無話語權。一次過招標更換工程用嘅係大廈基金，業委會通過就可以用，究竟業委們係有冇監察我地D錢係點樣用嘅呢？淨係識儲錢賺利息而唔去好好運用基金將樓宇升值，缺乏視野得不償失，完全唔符合精明理財原則。
屋苑流動應用程式大材小用
會所book 場只係Mobile APP 流動應用程式其中一個功能，其實個 APP主要作用係運用科技協助管理處加強屋苑管理同提昇業主居民使用體驗。好似推出前說好了第二輪會推出嘅訪客QR Code呢？透過APP繳交管理費? 連討論都費事影都冇？！
今屆(第十一屆)業委會將同居民有建設性嘅溝通途徑渠道落哂閘，只顧單方面喺大堂貼大字報宣傳, 到現時為止睇唔到有任何誠意同業主住戶進行溝通交流意見。譚太鼓勵各位住戶積極參加旁聽會議並爭取喺會議結束前提問一D平時問極都問唔到嘅問題，起碼都叫做表達左意見，係唔理想但都係冇辦法之中嘅辦法。
＃自置物業買左自己個單位之外仲買埋個公共空間使用權
＃公家嘢要一齊夾錢比管理處做維護管理
＃自己物業要自己監察
#財政預算用緊你同我荷包嘅錢
#業委會原本肩負監察管理處角色
＃大安旨意唔問唔理就比管理處幫你理
2023年11月14日
5座譚太 