新人事新作風: 隨口噏當秘笈？

第11屆業委會（住宅部）自從7月中上任以嚟都非常熱衷利用大堂當眼嘅告示板自說自話張貼一D圖文並茂嘅海報，帶出一D似是疑非嘅訊息企圖向住戶鄰居灌輸第10屆嘅委員冇做嘢要等佢地今屆上任先至將D改善工程落實。

就好似外牆航拍勘察咁，明明管理處6月份已經出哂通告喺6月28日安排第六座開始用航拍機做外牆勘察(圖一) ，譚太同前主席王太都有去到現場見證，咁都可以比今屆嘅主席張小姐講成嗰次係試飛，8月7日第二次嘅航拍係今屆上任唔夠一個月，會都未開嘅情況下「啟動」咁話喎！仲話我地誤會左? 真係莫名奇妙！另外又將由第10屆業委會主席王太提出，最後向信德爭取到嘅$35萬航拍費贊助夾硬講到話係自己成功爭取嘅功勞 (圖二)，內容同事實有明顯出入偏差，咁做有乜意思？背後有乜動機？

公契經理人協助張貼失實資訊責無旁貸

管理處作為持牌物業管理公司喺大堂張貼海報前有絕對責任檢視內容，確保資訊正確及不涉及詆譭或誹謗成分，點解明知海報嚴重失實仲刻意容許曝光及長期張貼誤導業戶居民？室內泳池天花下塌左咁耐，除左會所經理出過幾張通告預告泳池幾時重開之外，點解管理處唔公開勘察報告內容，圖文並茂向所有業戶闡述最新進度狀況？一個涉及數百萬嘅維修翻新工程，連招標文件都冇張貼大堂，係咪用大廈基金支付都冇住戶知？管理處係咪只向業委會15位委員負責就得，其他住戶就只有準時比管理費嘅義務而冇知情嘅權利？完全不可接受！

而最令譚太覺得詫異嘅係喺8月8日第一次嘅業委會會議上，張小姐屢次失言講出以上嘅失實言論，管理處經理同4位成功連任嘅委員包括做左兩屆4年嘅陳小姐都冇及時加以糾正，會議之後9位業委仲聯手以住宅部業委會嘅名義喺各座大堂繼續張貼失實資訊，混淆視聽！

4位連任委員今日的我打倒昨日的我？

今屆業委會（住宅部）9席之中有4席係成功連任委員，包括一座陳小姐，三座及六座兩位李生及五座梁生(圖三)。既然大堂宣傳告示板內容係以第11屆業委會（住宅部）名義發出，咁即係話呢4位連任委員同意海報內容，對於自己被批評喺第10屆嘅時候浪費左時間冇做嘢、做得唔夠好又唔夠快呢個主觀描述完全冇異議？對於張小姐會上批評上一屆嘅委員唔夠團結又有冇反省？真係大惑不解！

以事論事，雙向溝通

其實業委會同居民加強溝通本來係好事， 新一屆委員中亦不乏資深老手，想喺短時間內爭取好表現嘅心情係可以理解，四圍打曬鑼話畀人知你哋做咗幾多嘢都冇問題， 但係唔該內容一定要持平同做好fact check，吓吓將「要將過去嗰四年(兩屆)失去嘅時間追返」掛喺咀邊，講到以往兩屆嘅委員一無是處兼破壞和諧，只有過去嘅第七第八屆先至做到嘢咁，持續以指鹿為馬踩低人抬高自己嘅手法爭取表現誤導業戶居民。作為業主代表有呢D行為表現，業主居民又點可以指望佢地爭取權益呢？！

除非今屆業委會根本冇打算加強同業戶溝通，真正有心要做好同居民溝通工作去彌補管理處嘅不足係唔可以單方面張貼大字報，主動聆聽同增加透明度都好有必要。自七月中上任以黎，業委會點解唔考慮增設工作小組或者居民互動群組？舉辦定期主題茶座見面會，甚至將業委會會議同步進行網上直播呢？有業主住戶問過，得到業委陳小姐代表回覆喺一座管理處辦公室嗰度有個業委會專屬嘅意見箱?!

業委會涉嫌容許非委員參與業委會工作

另外有證據顯示業委會同管理處日常會議及巡視場地嘅工作期間容許非業委嘅鄰居住戶參加(圖四)。咁其他業主住戶要參與呢D活動有乜嘢準則同渠道呢? 參與者係以乜嘢身份參加? 有冇參與決策？聽聞呢D亂象喺歷屆數年前嘅業委會已經出現過。身為公契經理人嘅管理處有必要正視問題檢討做法並向全屋苑業戶清楚交代上述情況是否依然存在，將會採取乜嘢措施積極取締避免同類事件再次發生！

業委會肩負監察角色不容混淆

講返今次室內泳池天花倒塌事件，住戶其實都係好簡單想知個泳池幾時重開，趕唔趕得切喺天氣轉冷，室外池要閂之前開返室內池啫。新一屆業委話上一屆唔做嘢又做得慢；佢地呢一屆業委先至做到嘢。似層層講到好似業委會要做埋管理處嗰份要負責寫標書、請顧問、拆走假天花、做埋工程咁！如果真係咁我地仲使乜出糧比管理處上下咁多個職員？每年又使乜額外無情情比多$400幾萬經理人酬金比管理公司「管理」呢個屋苑呢？

管理處身為公契經理人收左住戶比嘅人工同酬金係有義務聘請培訓足夠人力資源提供物業管理服務，設立有效管控機制維持屋苑日常運作特別係監督外判商; 業委會嘅角色定位係收集同反映居民意見，同管理處商討協調日常運作同監督工作，兩者角色互不重叠。而只要兩者做好自己本份，正確的事正確的做係最符合屋苑嘅最大利益。

好一句：「為免有些人亂寫，破壞屋苑和諧！」- 節錄自第十一屆業委會(住宅部) 告示内容

譚太只能認同「為免有些人亂寫，破壞屋苑和諧 誤導業戶居民！」。 所以花左D時間總結左自從4月份泳池天花(室外部分)下塌後，過去呢半年間究竟管理處係點樣處理呢件事。由當初管理處不接納譚太建議聘請專業人士為會所天花進行全面勘探，到後來室内泳池其他地方相繼出現問題甚至大面積倒塌，先至急急咁自行邀請報價聘用專業顧問，答案都可以在以下嘅事件簿中揾到 (圖六)。

業委會要求擴大泳池天花維修範圍，後加風火水電工程

喺8月8日第一次嘅會議上需然冇即塲討論，業委會已清晰向管理處要求將本來顧問同管理處都話可以保留嘅zone5(近閱讀區附近)的鋁板天花部份，順便更換埋覆蓋住嘅風火水電系統, 所以呢D額外工程係需要另外再度招標採購。 而根據市建局嘅電子招標平台(公衆版) 網頁資料顯示，管理處係9月23日開始招標, 截標時間係幾日前嘅10月5日(圖七)。估計後續做埋回標分析同預留時間比委員投票, 工程大概最快都要10月中先至可以開工維修。至於完工日期就有賴業委會幫我地居民同管理處及中標承辦商溝通協調，盡可能安排室内泳池可以喺年底前重開喇！

圖七: 業委會要求擴大泳池天花維修範圍及後加風火水電工程, 開工日期一再推後

再次要求管理處正視公用設施老舊問題, 及時制定預算更新及落實藍圖

一葉知秋, 從今次游泳池天花塌下呢個實例可見管理公司係冇為屋苑嘅公用設施做好風險管理及可延續性規劃，管理水平仍然處於頭痛醫頭, 脚痛醫脚嘅級別, 唔足以滿足今時今日我地業戶嘅需求。欠缺規劃有序翻新設施除左對住戶構成安全隱患, 屋苑嘅競爭力明顯比其他簇新嘅樓盤給比下去。强烈建議業委會喺下次嘅會議加入議程討論，要求管理處制定及落實檢查各樣公用設施及批量維修更換時間表, 並列入年度財政預算案嘅五年計劃之内, 細心規劃及有序展開工程, 為保持屋苑的可持續發展及競爭力而努力，有勞了！

2023年10月8日