近日同鄰居傾開大家都發覺屋苑出現左好多生面口紙板（做樣）保安員，女性居多，個個企喺度又做唔到保安嘅工作，行行企企唔知做乜，問我乜管理處唔係對每個崗位有特定指引同標準比D承辦商嘅咩？答案係同大家估計一樣:「冇嘅」。
好似三座後閘呢個位，合約一向要求非華裔保安員站崗，但係幾個月前開始已經因為外藉員工要放暑假而由本地散工替位頂上。有D擔遮開工，掛住大大個開工袋喺閘門；有D一隻手頂住度閘任人出入，一手拎住電話傾家事（大聲到附近人都聽到）；有D索性耷低頭公然睇手機，有人經過都當睇唔到。今次仲將個崗位位置同工作改埋，真係離哂大譜！「有諸形於內、必形於外」，可以話呢D絕對唔係單一事件，總之係五花八門，日日新鮮。
有住戶試過即時向當值主管投訴，得到回覆話係睇唔到或者嗰度冇 cctv。咁我地24/7每更額外請個駐場保安主管有乜作用？除左創造就業，要比多D管理費同經理人酬金，保安公司又可以賺多D，真係諗唔到對住戶有乜益處🙄
不過公道D講亦都有個別有經驗又稱職嘅保安員，不過為數不多，且買少見少！管理處成日話難請人，叫我地住户包容，但係我地出嘅人工已經到達豪宅價，既然管理處對於監管管理咁唔重視又顯現出無能為力，點解唔多運用硬件設計同科技去解決問題，而係要我地住戶長期忍受呢D低劣服務質素，貼錢買難受呢？值得深思。
＃毫無競爭之下自動加價續約4個月
＃人工加左質素唔見有丁多改善
＃屋苑保安經理同外判主管繼續隻眼開隻眼閉？
＃一間長期比唔到符合質素要求員工嘅保安公司就要被叮走
＃安裝地鐵入閘機配合人工智能把關好過喇
5座譚太 