昨晚(5月13日)正在圍封進行檢查/維修石膏板大面積部份塌下…
自從4月初泳池室外部份天花下塌後，譚太一直有同管理處溝通，佢地冇意思要作全面室內天花（包括喺正隔離嘅男女更）檢查。工程經理話：
1. 下塌部份係石膏板唔係石屎（即係責唔死人喇）；
2. 天花下塌係因為室外位置經歷風吹潮濕日照，屬自然損耗（同平台防水層是否失效無關）
3. 呢D位置係一向冇安排定期檢測或做防禦式保養更換
所以就算當時目測已見到室內金屬做嘅條子天花已出現銹蝕現象，管理處嘅回覆都係「冇計劃為會所進行全面室內天花檢查」。
到事隔數週後嘅4月28日，會所報告懷疑室內天花板結構出現問題而有下塌危險，管理處又匆匆閂池圍封作「緊急維修」，對業委會就話作「全面檢查」，原預計室內池於5月19日重開，期間完全沒有通知業委會或工程及維修小組檢查結果及後續維修方案。問起就攞出「事態緊急而唔需要業委會投票通過10萬元以上嘅維修工程*」做擋箭牌！ 《*根據5月9日業委會會議上通過的「 採購價值超過港幣十萬元的供應品、貨品及服務之標準招標作業流程」，在緊急情況下管理處雖可自行招標，但仍需向業委會提交有關採購資訊， 繞過業委會招標及揀選供應商的原因等，並即時生效。》
今次室內天花喺「檢查」同「維修」嘅期間再次下塌極不尋常。現場雖然已圍封，但係過左2星期有多而隱患卻仍然未有及早被專業工程人員發現，實在難以置信！就算唔影響到泳客住戶，對於喺現場工作嘅維修工作人員，何嘗又唔係一個安全威脅？
上週二（5月9日）嘅業委會會議中譚太再次追問管理處會所何時進行全面室內天花檢查，工程經理都仍然話目前只安排咗為室內泳池部份檢查，無其他計劃。追問之下先至話要等呢個檢測報告結果出爐之後先至再決定會所其他位置要唔要做…
會議中譚太引述一則由原居民業主提供嘅資訊，表示多年前平台花園中心有「The Belcher’s」字體的綠植位置曾經發生玻璃圍欄被植物/土壤迫爆而引致玻璃碎片下墜到泳池上面的意外，並再三鄭重要求管理處要加快檢查平台車路、行人路及綠植地面嘅防水層及盡快維修，避免意外再次發生，否則後果不堪設想！
雖然喺未有完善檢查呢幾次天花下塌原因為何之前大家唔應該妄下判斷，但與此同時，管理處亦應再三慎重考慮「石膏天花板的實用性及維修價格高昂」問題。長遠而言除左係安全隱患之外，對屋苑維修亦造成一個不輕及不必要的負擔。
＃管理不善
＃你急佢唔急系列
＃會所天花下榻係安全隱患
＃室內泳池緊急關閉維修
＃室內泳池重開日期勢必延誤
＃石膏板天花過時又嘥錢保養
＃一日冇長遠解決問題方案年花50萬整天花石膏板都只係嘥錢同無補於事
2023年5月14日
5座譚太 