「招標妥」幾時用、點樣用、先最妥？

---

「招標妥」一問一答

問: 屋苑維修工程立立亂，點解唔用政府資助嘅「招標妥」？我聽啲居民話，有招標妥，就乜都妥㗎喎！

答：首先「招標妥」唔係所有工程都啱用。另外其中一個先決條件係無論工程複雜程度及是否單一項目，都必定要屋苑自費聘用工程顧問，費用一般佔總工程支出嘅一個佰份比，條數唔細，用喺一個好簡單嘅工程上面，會唔會浪費咗呢？呢啲都係要考慮㗎！

再者，一般緊急工程又唔可以用到，可以想像到用得「招標妥」嘅都係一啲大型綜合工程，係需要時間審視規劃，取得大部份業主共識，落實做邊啲復修工程同埋範圍後，先再申請使用「招標妥」都未遲！

問: 就算冇工程做都可以申請定先嘅啫，聽講好多人排隊申請，用8萬蚊霸住過位到好吖！

答：當所有文件備妥，巿建局只需一個半月時間批核申請。申請人須於指定期限前付款及簽約，服務便正式開始。所以不存在預先批核及霸定位呢啲情況。

而合約條款所指需要喺21個月內完成「招標妥」嘅流程，即成功開到業主大會揀選合資格承辦商呢一步，就由申請批核，成功交費一刻開始計算。喺冇討論，冇共識，冇復修目標嘅情況下，呢個絕對係一個挑戰！所以巿建局都強烈唔建議屋苑喺冇具體維修目標，工程項目又未經業主大會同意前，先行通過申請「招標妥」服務㗎！

再者如果為咗申請服務而胡亂推一啲工程上馬，既費時失事，又冒住爛尾收塲嘅風險，後果堪虞！

問: 政府宣傳用「招標妥」可以避免工程被圍標風險。你唔贊成宜家申請使用「招標妥」服務，咁你即係圍標黨喇！

答：「招標妥」服務係由政府資助業主團體以一半費用（即8萬蚊），以巿建局轄下公司名義聘請一個「專業人士」（有別於工程顧問），用意協助業主組織跟著「招標妥」嘅指定流程規範，一步一步有秩序咁完成招標程序。成個服務只去到揀選承辦商，之後嘅工程監督，收貨驗貨都要靠我地自聘嘅工程顧問。連巿建局都只係話計劃有效減低圍標風險，而唔係完全杜絕圍標情況㗎！

寶翠園一直有做維修保養，樓齡唔夠20年, 既冇收到屋宇署嘅強制驗樓通知或者修葺令，係唔應該喺茫無頭緒，做乜嘢工程都未知嘅情況下申請「招標妥」。宜家唔贊成用，正正係因為喺屋苑復修計劃方面我地完全未有方向，亦都冇討論，冇諮詢，冇共識！等到有合適工程項目時，我係會毫不猶疑咁支持使用「招標妥」！

另外，「招標妥」提供嘅專業人仕只係「屋宇測量師」，所以係唔會同比到意見處理下面呢啲類型嘅維修工程：
(i) 維修擋土牆或斜坡；
(ii) 更換或維修康樂設施；
(iii) 更換、提升或維修電力裝置、系統工程； 或
(iv) 更換、提升或維修升降機設施。

問: 「招標妥」唔係比我地呢類有業主組織嘅高級屋苑用。我地檔次比起嗰啲既殘舊又冇法團嘅單幢樓高好多！

答：「招標妥」只係巿建局「樓宇復修綜合支援計劃」一籃子項目中的一個資助業主組織服務，毋須經過差餉租值審查，覆蓋全港大小私人樓宇，樓高3層或以下的樓宇或新界豁免管制屋宇則除外。

至於是否適用服務，還是要根據工程的複雜性及迫切性作詳細考慮。

問: 會所更衣室同遊樂設施殘舊，淨係整呢度都可以用「招標妥」喇！

答：維修或更換康樂設施，「招標妥」服務範圍係唔包㗎。重有「招標妥」著眼點係建築物維修，係唔會比到升級裝修呢啲建議㗎噃。

問: 之前個戶外天花工程咪可以用囉，比多8萬蚊，點解唔用？

答：舊年(2019年)三月管理處聘請咗第一太平戴維斯獨立顧問到屋苑勘察同提交報告(相關連結)。結果顯示當時天花結構良好，沒有發現嚴重銹蝕情況，亦沒有潛在危險。如因外觀而更換部份殘舊飾面，相對工程比較簡單，可交由「工程及維修小組」與管理處先商討後研究再作處理。

問: 講咗咁耐，屋苑咁多維修工程， 又想用「招標妥」，應該點做呀？

答：主席譚太在8月中加入業委會轄下成立嘅「工程及維修小組」後，已要求下次小組會議上與管理處共同檢視屋苑嘅「五年大型維修計劃」，嚐試從中按工程緩急先後而排序。取得初步建議後再交上大會討論及審議。以下是樓宇復修嘅六個步驟：

同時亦想鄰居明白「招標妥」服務只是在屋苑揀選合適承辦商過程中（21個月內）起了支援作用，是絕對不可以替代屋苑的維修管理，巿建局亦沒有督導角色。所有工程維修項目，邊啲需要做，做幾多同點樣做，都係由居民組織經過充份諮詢後，先可以再決定。並非用咗「招標妥」就乜都妥㗎！