感謝前業委 Ringo 昨晚喺群組提出一個好問題：「$3000萬 外牆工程點解冇人知？管理處喺財務預算案中竟然隻字不提？」後來從業委陳小姐回應得知「業委會已要求管理處在工程展開前，必須先開說明會向所有住戶清晰交代整個工程，村經理亦已答允。」譚太聞言有感而發作出以下評論回應，希望阿主席同委員們聽得入耳。
其實工程展開前先至搞個「說明會」即係先斬後奏有乜作用？係想「知會」鄰居你地OC 已經代表左業主贊成通過左呢個由 MO 審視批核 $3000幾萬嘅大維修方案？咁到時業主住户出席呢個說明會仲可以做到D乜？有得揀咩？抑或純粹自我感覺良好當係做左「諮詢」比淨出一個通告好少少呢？
$3000幾萬用左大廈基金一半儲備唔係少數目，係全年開支嘅三份之一。 Ringo 嘅意思係點解OC唔成立個工程專責小組，比有相關管理經驗嘅業主鄰居參詳比意見先至去招標。睇返最近11月20日OC 第三次會議, 議程都係寫「由管理處匯報外牆堪察報告進度」及「通過維修外牆工程跟進安排」？當日我冇在場， 請問各位OC委員有冇投票通過咗啲乜嘢呢？又唔知阿主席幾時先至簽發會議紀錄，我地小業主又可以問邊個呢？
仲有外牆航拍勘探工作6月已經開始，10月管理處已經出哂問卷通告話知道外牆維修日期同抹外窗有衝突，想「勸退」大家唔好抹慳番三百萬， 咁即係10月份管理處同 OC已經知道工程範圍同施工方案？ 唔係嘛，宜家12月尾窗已經開始抹， 成個外牆勘察由請顧問寫標書，到現場勘察測量寫報告 已經花左$40萬，連個報告個封面影都未見過，管理處喺毫無預警鋪排之下喺前日12月29日正式通知要加6％管理費先至提吓下年要喺大家嘅豬仔錢罌攞$3000萬出嚟用？ 係咪因為用大廈基金只要OC通過就得，所以就冇業主要知嘅事？ 冇厠所水通告都入信箱，貼大堂，貼電梯又上埋 APP喇！咁大單工程招標又唔按建管條例344採購工作守則貼份標書喺大堂想點？花左40萬做嘅報告淨係比 OC睇？工程要做D乜同點樣做都唔知？ 每戶平均要夾成$14,000竟然可以係一行字咁輕描淡寫？預算案直頭都費事提？ 請問OC係呢件事上，除左喺你地喺大堂專屬嘅宣傳板上面大大聲表示同管理公司「成功爭取」到$35萬資助航拍費用外（ 實則係信德回應上一屆業委會要求管理公司回贈屋苑嘅成果），你地仲做左D乜嘢去監察管理處整個$3,000萬採購過程及運作呢？11月第三次會議究竟OC 議決左D乜嘢？可以講比大家聽吓嗎？我唔覺得 OC 會議上嘅討論有乜咁秘密，陳小姐你係委員應該有保密協議豁免權係咪？麻煩同大家喺度交待吓。
另外我更加建議業委會要求「管理處盡快喺各座大堂公開外牆勘察報告及建議」， 並且自行舉辦一個「業主居民交流大會」邀請所有業戶持份者同管理公司要員出席，可以大大提昇這個工程推行效率同質量，請你地認真考慮一下，唔該哂!
同場加問: 用咁大筆錢無需在居民大會（AGM/EGM) 通過？
- 根據大廈公契規定，經理人進行任何採購其金額如超過該年度預算案總支出20％，該項採購便需要交由業主大會中表決。2024年度總支出預算高達一億一仟萬， 採購金額要過二仟二百萬先至要攞去業主大會議決通過。 其餘高過$10萬至$2200萬，交由OC 舉手議決就可以。
不過你有張良計，我有過牆梯。管理處有本事說服到業委會將D工程分拆開幾期黎做咪唔駛過大會囉。 聽聞 MO係打算將六支大樓外牆維修工作分開三次做，每次兩座一齊做，話要試吓睇吓效果點先至再招標再做。分開三次每次仟零萬，只要業委會通過就得。業委會好似都無異議話好，不過就唔知最新嘅情況係點。 - 其實一個重要采購去到比業主議決已經係最後最後嗰一步。喺管理處、顧問同業委會傾呢個3仟萬預算方案時就應該要向居民發放勘察報告摘要，例如勘察結果，風險預測，制定緩急先後不同方案去比大家審視。講真高危嘅地方就點都要做左先，唔使等招標都要做。其餘地方就分階段按次序做， 但合約就一定要整體一次過六支樓一齊招標，只要安排好合資格人士驗收，合約又有賞罰機制，又使乜驚話個判頭做得唔好冇得踢佢走喎？！
- 所以我非常贊成 Ringo 所講業委會要儘快成立各個工作小組幫輕吓業委會。而家成個業委會好似淨係得返陳小姐會應吓機咁，真係辛苦佢。業委會成員中又唔多覺又積極又有相關經驗嘅成員關注。 年度過億嘅洗費，你唔理，我唔理，最終就比左D唔關事嘅人幫我地理㗎喇！
2023年12月31日
5座譚太 