仲有三日嘅時間，成個 AGM 除左業委會選舉係近日大家熱議之外，議程四及五揀選未來兩年「清潔」及「保安」承辦商合約總值接近$7000萬嘅2支大標，洗嘅都係真金白銀大家荷包嘅錢，佔平均每戶每月管理費支出約$1,300，一定係各位業主住戶值得關注嘅大事！
先斬後奏同承辦商傾短期續約
其實清潔同保安服務兩年合約都一齊喺今年嘅5月底屆滿，直至2月底村經理先至喺業委會毫不知情（起碼我唔知喇）嘅情況下施施然咁話已經同2間現役承辦商「嘉捷」同「警衛國際」要求以原合約價短期續約4個月，但係2間承辦商都同時要求喺5月1日最低工資生效嘅時候「加人工比夥計」，最終傾唔掂數喎！
捨易取難：避開EGM, 短期內2次頻密招標怪招
咁5月底先至完約，仲有3個月咪正式公開招標2年合約，趕唔切搞AGM，咪召開一個EGM淨係得2個議程投票囉！管理處竟然話連 EGM都唔夠時間做，反而將2年的合約分拆成一個4個月嘅合約「重新公開招標」，結果清潔有5支回標，保安得2支； 最後由業委會以電郵7票贊成揀選返唔係最低標嘅現役承辦商「嘉捷」同「警衛國際」做返，加幅分別成12％及9.6％！ 譚太同曾生2位委員喺今次呢個夾硬黎兼「變相加人工」嘅招標程序甚為不滿，所以冇投票以示抗議！
冇準時及早公開招標責任誰屬？
Common sense 普通常識都諗到，兩個合約喺2年前嘅6月1日生效，要確保新舊合約順利銜接而唔會製造「服務中斷危機」，最少要喺合約完結前半年開始籌備招標，即係2022年嘅12月就應該開始着手，嗰陣時仲啱啱做完財政預算，管理處又出哂通告話黎緊因為最低工資5月生效所以要增加管理費7％。記得出通告又唔按時序公開招標，夾硬要做一個短期合約招標，究竟對寶翠園各住户消費者有乜好處？就算真係更好的回標商可以選擇，唔通4個月內要轉換2次承辦商？管理公司究竟諗緊乜！
大會表決前三天仍未向住戶發放2年合約回標分析
一向業委會投票議決採購項目，委員都有7天時間考慮回覆，而譚太亦有參與呢2次開標同見標會議，仲一直催促管理處要效法2年前一樣，盡早以小冊子型式將資料發放給居民。管理處一直借左聾耳陳隻耳完全冇反應。咁叫業主跟住乜嘢去揀？
終於今日下晝見到承辦商自我介紹嘅資料貼左喺寶翠會10樓接待處嗰層，究竟係貼左又當做左定係唔想比咁多人睇呢？大家自行判斷喇！
#管理不善
#園藝合約同樣係5月30日到期又做到
#搞EGM就話唔夠時間 #搞AGM都唔見得準備充足
#短期內搞2次招標比足2次加價機會係管理公司責任
#好快就知其實最後有冇得比業主消費者揀
2023年7月10日
5座譚太 